Peddemala

Biu de ojos e lestru 'e
temperamentu de caddu
ignorante, rampellu e puzzinosu;
anima malaitta in corpus sanu.

Truvende unu masone in Monte'Ertosu,
l'han duos costerinos affrontadu,
propriu s'annu chi s'est fattu isposu.

In mudandas do linu ch'hat mandadu
unu zertu mercante,in die 'e frittu,
pustis de l'haer de totu ispozadu.

supportadu in dogni situ,
sempre campend'e sU suore anzenu,
d'esser grande ladrone hat su meritu.

De ca notte non timet su serenu
né tronos de tempestas e nemmancu
de sa legge cunsiderat su frenu.

De sos reos sezidu est in su bancu
pius de una 'olta e in galera
ch'hat pasadu culatiga e fiancu.

Connoschet cantu est manna Sa Costera,
sos saltos de Osidda e de Nuoro,
ca b'hat amigos de'...cudda manera.

Preferit su 'eranu in Logudoro;
in sos istios l'aggradat s'altura,
sa Nurra de jerru intro su coro.

Ca 'ona li essesit congiuntura,
che truvesit in montes de Nughedu
masone e caddu masciu a sa pastura.

Miraculu chi solu in su...buachedu
podet suzzeder chi da-e s'intragna
de unu caddu masciu nascat fedu,

Peddemala lassesit sa montagna
cun su masone sou e cun s'acchettu
cun d'un'...anniju fattu in sa campagna.

Pro male non l'hat fattu o pro dispettu,
chi anzis - pro sa santa veridade
trattesit in cussolza cun...ríspettu:

Ma sa legge,l'ischimos, piedade
non podet haer pro sos bardaneris
chi non rispettan sa propriedade:

su marisciallu 'e sos carabineris
che li colpat in domo a notte manna:
-S'in nomen de su re non mi l'abberis,

mi l'abbelz'eo cun forza sa gianna
li narat;e issu, a rassu a rassu,
cun forza cantu haiat in sa canna,

rispondet: -..pro su re bi ponzo s'assu..-
E cunvintu chi 'ennida fit s'ora
de l'accordare a sa legge su passu,

torresit a presone e..b'est ancora.

Alghero li 24 Agosto 1957 Forico PITZOLU

Forici Pitzolu
de Bolotana

Maresc.Magg.CC.
in licenza a
-Via S.Bonaventra. II-
Nulvi
(ss.)