- MISERIA E AVARIZIA -

Unu poveru ezzu hat picchiadu
d'unu riccu sa gianna, domandende:
Pane, alloggiu pro sa notte falende
e, umile, rispost'hat isettadu.

S'eco had'in coghina ribombadu,
in u-e fit sa familia chenende;
e, de sa oghe puru, tremulende,
su lamentu dolent 'est arrivadu:

Ma, tottu, han sighid'a manigare,
annotendes'in cara pari pari
mudos, pensende:"""lassade bussare !

chi non hamus nè pane nè dinari
nè semus obbligados d'alloggiare
bertulagios de pran'o de Gonari""".

Son ch'in taula sempi'han'agatadu
ricattu in abbundanzia chin binu,
non connoschen bisonz'a su mischinu,
prite mai bisonzu no han pro adu.

Sa vera caridad'ismentigadu
hana, pensend'a benes de terrinu:
Ahi, cale tremendu est su Divinu
giudiziu, pro issos riservadu !

Sos ch'in tempus no han'approfittadu
a fagher caridad'a sos afflittos
chin su bene c'apposta lis fit dadu:

Una die,pentidoso e cuntritos,
han'a prangher 'invanu s 'operadu,
ingiuriados, ortulende granitos !. ..?

GIRARDI Antonino
via Enrico Costa,n°35
CAGLIARI