Isettende Sa paghe


1
Pro cancellare s'impidu iracundu
de sa mundana, pessima zenia,
vinti seculos faghet su Messia
apposta enzeit a-i custu mundu.

2
Sos Anghelos in sa solennidade,
annunzian sa fine de ogni gherra;
Gloria in Paradisu e pagh'in terra
a tottu sos de bona volontade.

3
Però sa zente incredula est'istada
vittima de s'istintu malaittu,
o cun orrendu inumanu conflittu
benit Gerusalemme annientada,

4
Si distruit s'imperu e Oriente
e poi ruet s'imperu Romanu
ruet Napoleone e manu manu
han sighid'a distruer cosa e zente.

5
Su restu e sos Asburgos turbolentos
s'isfinit in sa gherra europea
ma s'egoismu cun sa ghigna fea
cunservat sos matessi sentimentos

6
Benit s'ultima gherra distruidora
ch'eet in su trintanoe iscoppiada,
cont'e cant'hat distruttu non s'fidada
ma c'hat zente ch'es pianghende ancora.

7
Fatt'est sa paghe sa gherr'est finida
ma su mundu est divisu in duo frontes;
Sa "columba e sa paghe" est in sos montes
fuende a contu sou, impaurida.

8
Oe puru che deris faeddende
de paghe sun "sos Mannos" in tott'ue,
ma in pinna a sa paghe b'est sa nue
de sas armas chi sunu preparende.

9
Si non c'hat paghe né serenidade
proite mund'ingratu ancora ries?
Senza pensare a sas ultimas dies
de custa isventurada umanidade,

10
Cunsiderende custos tempos tristos
paret chi siat bennidu s'istante
chi,de gloria est'du e triunfante
ad'a cumparrere in persone Cristos

11
Maestosu pro tanta sapienzia,
Sezidu subra su Tronu Divinu,
Giughe imparziale unicu e Trinu•
adda legger de tottu sa sentnzia.

12
Su die non pro tottu est die festa,
calicunu non faghet mancu s'anca,
morin sos chi de Issu sunu a manca
si salvan tottu sos chi sunu a dresta.

13
Pro viver in su Regnu e s'armonia
in su Regnu e sa paghe ed'e s'amore
ue pro RE b'est Cristos Redentore
e Reina sa Vergine Maria.

Gavino Cubeddu

Siligo li 6 settembre 1957