CHIETU CUCCIUCCIU MEU!

Su diaul ' e canaglia!
Te Bali! cuggia chietu,
ch'appena essis derettu
ti puntas pro sa quaglia.

Sos cucciucciu e mancu idu
nond'has'e fatt'a su seru:
che cane chi nd'hat abberu
attera olta ispilidu!
Ses perdende su sentidu
pro li fagher sa battaglia
in mesu cussa fenaglia
chi ti podes inzaffare
Mal ' appat e cazziare
Su diaul'e canaglia!

Sempre chi semus in domo
ti fatto s'avvertimentu!
ma tue, plus'attentu
ses puntadu finas como.
M'obbligas ch'eo ti domo
cun calchi mesu discrettu!
Mi dolet pro tant'affettu
ma tue pro cantu t'amo
non m'intendes cando giamo
te Bali! cuggia chietu.

S'haeres sensu e rejone
dias cumprender s'istoria:
ca s'enit sa menatoria
e t'idet: malaiscione!
a sa contravenzione
culpa tua so suggettu
ed'eo tand'a dispettu
si ti neghera su pane
finis cun s'acciappa-cane
appena essis d'erettu!

Lassala colza pasada
ca s'haeret pumas bellas
fit bolad'in sas istellas!
ma send'a pumas rasada
terra-terra s'scoada
la sighis tue canaglia!
Però cun cadena a maglia
e crabistadu su musu
chelzo creer chi non piusu
ti puntas pro sa quaglia.