Premio Ozieri di Letteratura Sarda - BANDU 2026: SA DE 67 EDITZIONES

BANDU DE SU CUNCURSU 2026

Iscadèntzia su 31 de martzu 2026

Su Prèmiu de Otieri, fundadu dae Tonino Ledda in su 1956, giòmpet acc'annu 70 annos e contivizat atividades chi agiuant sa cultura, sa limba e sa literadura de Sardigna.

RÈGULAS DE PARTECIPATZIONE

1.	Sunt ammissas a su Prèmiu sas òperas in limba sarda e in gadduresu, tataresu, saligheresu e tabarchinu.
2.	Totu sas òperas devent èssere inèditas e non devent àere àpidu reconnoschimentos in àteros cuncursos literàrios a sa die de s’imbiu.
3.	Si cuncurret a s’indonu e non b’at tassa peruna.
4.	Cada cuncurrente podet imbiare fintas a tres òperas, una pro donzi setzione.
5.	Sas setziones de su Prèmiu sunt:
	a) POESIA SARDA “Antoni Sanna”. Donzi cuncurrente podet imbiare una poesia a tema lìberu, cun rima o chena rima. Sa poesia non che devet colare sos 40 versos.
	b) PROSA SARDA “Tonino Ledda”. Dogni cuncurrente podet mandare unu contadu. Su contadu non che devet colare sas 5 pàginas in frommadu A4, cun corpus 12 e totu sos oros postos nessi a 2 cm.
	c) TRA POESIA E CÀNTIGU “Antoni Cubeddu”. Donzi cuncurrente podet imbiare una cantone a tema lìberu, sighende sos ischemas e sas formas mètricas ligadas a su connotu (atìtidos, cantadas in lira, cantones torradas, gosos, glossas, modas, modellos, mutos, nìnnidos, repentinas etc.). Sa cantone non che devet colare sos 40 versos.
6.	Sas òperas devent èssere iscritas a màchina o a computadore.
7.	Est agradèssidu s’impreu de sas règulas ortogràficas ufitziales o reconnotas dae sa parte manna de sas comunidades linguìstigas, comente cussa cussigiada dae su Prèmiu Otieri etotu pro su sardu, sa norma sighida dae sa comuna de s’Alighera pro s'aligheresu e cussas adotadas dae sa Regione Sardigna in contu de gadduresu, turritanu e tabarchinu. Pro informatziones prus fungudas, si andet a custa pàgina.
8.	Sas òperas devent giùghere iscritu, in finitia e in cada còpia, nùmene e sambenadu de s’autore, die e logu de nàschida, s’indiritzu, su nùmeru de telèfonu e s’indiritzu de posta eletrònica.
9.	Sas òperas anònimas o cun pseudònimos non ant a èssere ammissas.
10.	Si podet imbiare finas carchi riga de curriculum e novas subra a s’autore.
11.	Devet essere imbiada fintzas una tradutzione in limba italiana, e chie cheret, unu glossàriu de sas paràulas pagu nòdidas.
12.	Sos trabàglios devent giòmpere a su Prèmiu intro de su 31 de martzu 2026 in una de custas maneras, a sèberu de su poeta:
	a) imbiende sos trabàglios a s’indiritzu de posta eletrònica Questo indirizzo email è protetto dagli spambots. È necessario abilitare JavaScript per vederlo.;
	b) imbiende una còpia de sos documentos cun sas òperas in pabilu a:
	Segreteria de su Prèmiu Otieri Via Ugo Foscolo, 2 07014 OZIERI (SS).
13.	S’at a tènnere in contu de sa data de s’imbiu de sa posta eletrònica o de su sizillu postale.
14.	Chie imbiat sos trabàglios in posta eletrònica devet iscrìere sa setzione in s’ogetu de su messàgiu (es.: Setzione Prosa Sarda «T. Ledda»).
15.	Chie imbiat sos trabàglios in pabilu devet iscrìere subra a sa busta su nùmene de sa setzione (es.: Setzione Poesia Sarda «A. Sanna»).
16.	Sas òperas ant a èssere giuigadas dae sa Giuria de su Prèmiu, chi est frommada dae:
	- su presidente Dino Manca; - sa vicepresidente Anna Cristina Serra; - sos giurados Cristiano Becciu, Duilio Caocci, Clara Farina, Riccardo Mura, Gianbernardo Piroddi, Simone Pisano, Gabriele Tanda.
17.	Su giudìtziu de sa Giuria non si podet cuntestare.
18.	A sos primos tres classificados de cada setzione s’ant a dare sos prèmios chi sighint:
	○ 1º classificadu: assignu de € 500 e medàglia; ○ 2º classificadu: assignu de € 300 e medàglia; ○ 3º classificadu: assignu de € 200 e medàglia.
19.	Sa Giuria podet assignare prèmios ispeciales.
20.	Sos primos classificados podent torrare a binchere cussa matessi setzione solu a pustis de duos annos.
21.	Sos premiados ant a retzire un’avisu dae sa segreteria de su Prèmiu cun sa mutida pro partetzipare a sa tzerimònia de premiatzione.
22.	Sas poesias e sas prosas premiadas podent èssere postas in s’antologia annuale.
23.	Sos documentos non benint torrados in segus e s'Assòtziu si reservat sa facultade de publicare sas òperas cando e comente podet capitare, finas in sa ràdio, in sa televisione e in sos mèdios telemàticos, chena pagamentu perunu a s’autore, chi est semper padronu de s’òpera chi at iscritu e nde podet dispònnere a piaghere sou.
24.	A leare parte a su cuncursu cheret nàrrere chi s’autore atzetat in pienu sas règulas istabilidas dae custu bandu.

CENTRU DE DOCUMENTATZIONE

S'Assòtziu Premio Ozieri di Letteratura Sarda est cogliende totu sos trabàglios chi pertocant a sos poetas e a sos iscritores de Sardigna: maniscritos, libros, fotografias, filmados e àteru. Semus costoende in ie totu su chi amus retzidu in settant’annos de impignu nostru e bostru, pro lu lassare a eredade a istudiosos e a amantiosos de oe e de su benidore, a manera de sighire sas àndalas de un’idea chi non morit.

Si podet bìdere su trabàgliu già cumpridu in su giassu www.premiozieri.it.

Sos autores chi sunt interessados a lassare, dae como o unu cras, a su Centru de Documentatzione, totu o in parte, sa produtzione literària e documentos issoro, nos lu podent fàghere ischire a s’indiritzu Questo indirizzo email è protetto dagli spambots. È necessario abilitare JavaScript per vederlo..

Pro imprentare su bandu:

Chie cheret imprentare su bandu, podet leare su PDF inoghe: Qui