CANDO SA TERRA MIA...

Cando sa terra mia
s ‘at a prenar’ ‘e fiores campinos
inchintos d’erba frisca
da’ su lentore infusta
e consolada,
cando in cust’ ‘adde amada
ap’a intender torra
su murmuttu
de s‘abba de su riu,
cando onzi disaffiu
at a sensare,
tando ap‘a semenare
ranos chi in sas intragnas
su tempus m‘at regoltu,
po los bier brotande
in sas abréschidas
de unu sole tébiu.

E che omine sàbiu,
e fidele
a printzìpios cuados
in fundu ‘e chelos nidos,
sentidos ap‘a ponner
in assentu,
como ispartighinados
da’ su‘entu
de falsidade e tramas
de ingannu.
E su bene prus mannu
ap‘a giùghere
in altu, in bratzos mios,
cun sa fortza
de s’ispera cumprida
intr’ ‘e su pettus,
da’ su sinu allattada
de s’amore.