ISCURIGADA TEMPESTOSA DE IERRU

In brazzos de sa fritta
tempesta malaitta , irada e fea
sas aes s'ispemunan
intuppendesi in altos
pustialvos e chercos ,
ue in oras dulzes
giogaian bolende a colpos d'alas
in su 'eranu santu e beneittu.
Ah, ite notte fea, 'entosa e mala
ch'annunziat s'aera,
sas fadas in passera
s'intenden a burdellu in sos trainosl
Sos bezzos in zamarra
falan a su culle
sa linna pro sa notte a sa faddija.
Est già iscurighende,
sas tancas de su chelu
sestadas tottu a tulas
s'iden in andera
in s'infinitu campu biaittu.
S'intenden in sas baddes
sas toncas mimulosas
e ranas tottu a càderas
chi sunu accovazzadas
in s'oru 'e su poju buluzadu.
Ma ite notte fritta!
Non si resistit e ne si resessit
calar'oju istanotte
in sa pinnetta mia 'e Mavrianal
Monte Tundu est biancu,
cuguddadu 'e nie
e-i sos canes mios in carrela
appeddan a sa luna
imprateada e cun s'arzola manna.
Ma ite nott'e mimulas piena
de puzones cun pumas astriadas
chi s'intuppin bolende
in s'uma 'e s'aliderru e de s'ozastru .. .